[BookReviewN5]: هيبتا لمحمد صادق

عسلامة ناس لكل, ليوم جيت باش نحكيلكم علي كتاب ياخوش  منكم برشا و قت باش  تكملوه اما نأكدلكم إلي تأثيرو عليكم باش يقعد 

برشا 

أما قبل  كل شي نحب نشكر الصدفة الي خلاتني نقرا الكتاب هذا, خاطر ما كنتش حاطتو في البرنامج

ندخل مالا في الموضوع ماغير ما نطول عليكم 

هيبتا هو رقم اغريقي يعني سبعة (موش السبعة الي ستانسنا بيها بالطبيعة) الكتاب هو عبارة على محاضرة ل اخصائي في العلاقات الزوجية, ما تخافوش, ماهيش محاضرة كيما الي تعودنا بيهم, ياقف قدامك واحد و يبدا يقلك اعمل هكا و ماتعملش هكا,  محاضرة مش كلاسيكية حتى طرف, المحاضرة هي عبارة على اربعة خرافات  يتمحورو على المراحل السبعة للحب, ومن غادي يجي اسم هيبتا 

اربعة خرافات يحببوك في الحب و يكرهوك  فيه, يخليوك تحب تعيشو و تخاف لا تعيشو في نفس الوقت , يخليوك تعيش بين الجنة و النار و يذوقوك حلاوتو و مرارتو, اما هذا كلو في كفة و النهاية الي ما كان يستنى فيها حد في كفة اخرى

ما عندكم حتى فكرة قداه نحب نحكيلكم على كل شي, اما ما نحبش نكون أنانية و نحرمكم ملي حسيتو وقت قريت الكتاب, هذاكا علاش ننصحكم علخر باش تقراوه خاطر متأكدة إلي ماكمش باش تندمو

الكتاب ما نجم  نقول عليه كان إبداع, طريقة كتيبة ساهلة و خفيفة اما في نفس الوقت فيها برشا تشويق 

عرفتوه المشهد الي قبل نشوفوه في الأصدقاء الصغار؟ واحد عطشان يمشي في الصحراء يشوف ماء اما بعد ما يوصل ما يلقى شي , الكتاب هذا عملي هكا , في كل ورقة نقول توا باش نفهم الكاتب وين يحب  يوصلني,اما بعد نلقاه زاد ضيعني لين فلخر نلقا 

روحي قدام نهاية ما كنتش نتوقعها

ما نحبش نزيد نحكي أكثر نخليكم تتكتشفو الباقي و ما تنساوش باش تخليولي رايكم